mobile
Gagauziya Başkanı İrina Vlah buluştu sayın Serkan Kayalarlan, TİKA kurumun öndercisinnän. Buluşmakta söz gitti proektlär için, angıları yapılêr hem yapılacek yakın zamanda Gagauziyada.
Başkan urguladı, ani TİKAnın 2020-nci yılda yardımı pek lääzımnıydı Gagauziyaya. TİKAnın yardımınnan COVİD pandemiyasına karşı ekipman geldi.
İrina Vlah hem Serkan Kayalar konuştular İndustrial koledjin düzülmesi için. Tender düzmäk kompaniyasını ayırmaa deyni geçirilecek mart ayında. TİKA tarafından lääzımnı finanslar için karar kabledildi.
Gagauziya Başkanı teklif etti TİKAnın öndercilerini pay almaa İndustrial koledjin temel atmasında.
Buluşmakta söz gitti Valkaneş kasabasında su hem kanalizațiya proekti için da. Yakın zamanda Gagauziyaya gelecek uzmannar, angıları yapılmış işlerä analiz yapacek hem kalan işleri başarmaa deyni plan hazırlayacek.