mobile
Gagauziya Başkanı İrina Vlah kabul etti Komratta sayın Gürol Sökmensüeri, Türkiyenin Moldovada Büükelçisini.
Başkan hem sayın Büükelçi kontrol ettilär Komrat sport kompleksinin düzülmesini. Bu proekt yapıldı Türkiyenin tarafından finans yardımınnan. Stadionun düzmäk işleri sonuna yaklaşêr.
Futbolcuların artık var kolayı hazırlanmak oyunnarını geçirmää stadionda. Bu günnär tribunaların altında bulunan odalarda iç işleri yapılêr. Sonunda bulunêr kapalı sport salonun düzülmesi da, neredä basketbol, voleybol hem mini-futbol oyunnarı geçecek.
İrina Vlah annattı sayın Büükelçiyä, ani Bakannık Komiteti başardı elektrika, su, kanalizațiya hem gaz komunikațiyalarını eklemää sport kompleksinä.
Bulunarak stadionda, söz gitti onun açılışı için da, angısı plannanêr Hederlez ayına.
Başkan hem sayın Büükelçi baktılar erleri, angıları verildi İndustrial koledjini düzmää deyni. Recep Tayyip Erdogan adına etim kompleksi bulunacek 5 hektar toprakta. Şindiyä kadar avtonomiyanın kuvetleri başardılar elektrika direklerin geçirilmesini, neyä harcandı 1 milion leydän zeedä.
„Biz hazırız başlamaa düzmäk işlerini. İndustrial koledji – o önemli bir proekt, angısı yardım edecek ekonomikanın industrializațiyasında, iş erlerini açmakta hem uzmannarı hazılrlamasında. Butürlü biz var nasıl inandıralım gençleri üürenmää hem çalışmaa Gagauziyada. Biz saa ol deeriz Türkiyeyä gagauz halkına yardım için“, - söledi İrina Vlah.