mobile
Saygılı Raisa İvanovna hem Vladimir Stepanoviç!
Saygılı Mihail Vasilyeviç, saygılı Gagauz Respublikasını kuran veterannar!
Saygılı katılımcılar!
Büün nışannȇȇrız bizä deyni acı bir gün. Beş yıl geeri geçindi Stepan Mihayloviç Topal, Gagauz Respublikası Prezidenti, gagauz halkın oolu.
Gagauziyanın eni istoriyasında Stepan Mihayloviçin rolu yazdırıldı çok bilim statyasında, monografiyalarda, gösterildi dokumental filmalarda. İsteerim tutalım onu aklımızda diil sade prezident gibi, ama bilelim, nesoy o adamdı.
Stepan Mihayloviç hiç benzemäzdi sıradan bir politika adamına, incä üzlü bir adamdı, aaramardı komfort ne iştä, ne dä evdä. Yazı masası, skemnä hem çok dokument – sade bunnar vardı onun iş erindä taa prezident olmadaan, prezident görevindä hem prezidentliindän sora.
Stepan Mihayloviç çiftçi aylesindä duudu hem kayet çalışkan bir insandı. O bilmäzdi ne dinnenmäk günnerini, ne yortuları. Hep bölä istärdi çalışsın hepsi zaametçileri hem kolegaları.
O toplamadı kendinä varlık, dostlarını hem hısımnarını da zengin yapmadı, çünkü azetmäzdi büük zenginniktän. Onun yoktu gözü görsün onnarı, kim gelärdi kuvedä zenginnemää.
Canabisi sayardı kolegalarını hem zaametçilerini profesional kalitelerini. Önderci koyardı sade hazırlanmış profesional insannarı, ama diil kendi kumilerini hem senselelerini.
Bundan kaarä, Stepan Mihayloviç ii psihologtu, becerärdi duymaa hem annamaa karşıdakı insanı. Kendi yaşamasında politik hem diplomat olduunu hiç düşünmedi dä, ama geçmiş asirin 90-ıncı yıllarında pek ii götürdü görüşmeleri. Kişinövun hem Komradın arasında politika konsensusu, bizim topraamızda usluluk oldular, çünkü bizim prezidentimiz becerärdi dialog kurmaa hem annaşmaa.
Büün Gagauziyada etişkin yaşamasına girer eni boylar, angıları pek islää bilerlär gagauz dilini, angıları zanaatını kablettilär evdä, Komrat devlet universitetindä. Avtonomiyamızda bizim gençlerimiz çalışȇrlar önderci görevlerindä, türlü izmetlerdä, biznestä. Taman bunu da istärdi bizim liderimiz, ki gagauzlar korusunnar kendi dilini, kulturasını hem kinmiini, hem düzsünnär yaşamalarını burada-avtonomiyamızda.
Böläydi bizim prezidentimiz Stepan Mihayloviç Topal.
Duumasından bir lider, duumasından intelektual, büük hem açık ürekli adam.
Makar ki Canabisi artık beş yıl nice geçindi, pek duyulȇr, ani bizä etişmeer onun aarif nasaatları hem sıcak boba sözleri….
Şükür ederim hepsinä, kim saymadı zaametini da geldi anmaa Stepan Mihayloviçi hem olmaa bizimnen bilä. Şükür ederim hepsinä, kim unutmȇȇr bizim liderimizi da inanç kalȇr onun ideallarına hem paalılıklarına.
Saa olun.